Pages

Tuesday, July 24, 2007

သို့ဖေဖော်ဝါရီ..၃

ဖေဖော်ဝါရီရေ
ဆူးလေမီးပွိုင့်မှာရပ်ပြီးငါငေးတယ်
၂၀၇တစ်စီး ၃၇ဘီအမ်တစ်စီး
ပါရာဒိုတစ်စီး ဟိုင်းလတ်တစ်စီး
စူပါရုဖ်တစ်စီးငါ့ရှေ့ကဖြတ်သွားကြတယ်
ငါကဘယ်ကိုဖြတ်ကူးရမှာလဲ
လမ်းတစ်ဖက်မှာအရင်လို
မင်းမှရပ်စောင့်မနေတာ
ရုပ်ရှင်ရုံမှတ်တိုင်မှာက
မဟာမြိုင်တစ်ယောက်နှစ်ရာလို့
ကြားကားစပယ်ယာတွေအော်နေတုန်းပဲ
အဲဒီအသံတွေပေါ့ ငါ့ဆီကမင်းကို
စိမ်းစိမ်းကားကားဆွဲခေါ်သွားခဲ့ဖူးတာ
လူတွေရှုပ်နေတဲ့ကြားကငါလွမ်းတယ်
၃၅မီနီဘတ်စ်တွေငါ့ဘေးကဖြတ်သွားရင်ငါလွမ်းတယ်
မန်းမြို့တော်ပေါက်စီဆိုင်တွေကို
မမြင်ချင်ယောင်ဆောင်သွားမိတယ်
မင်းမရှိတော့လက်ရွေးစင်မှာ
ကော်ဖီမသောက်ဖြစ်တာကြာခဲ့ပြီပေါ့
၄၈ လမ်း၅၀ သဘောင်္ကျင်း ရန်အောင်
ဝက်စု ဗန္ဓုလကသွားမှာ အနီရောင် အနီရောင်
ငါ့ကိုမလှောင်ပါနဲ့ကုန်ဈေးတန်းမှတ်တိုင်ရယ်
ပလက်ဖောင်းကဖီးမှာက
အသက်မဲ့နေတဲ့ကော်ဖီမစ်တစ်ခွက်နဲ့ငါ
ညနေကိုအလွမ်းနဲ့ထုပ်ပိုးပြီးပြန်လာခဲ့တယ်
ဘုရားသခင်ဆီကအိမ်ကလေးတစ်လုံးလောက်
လက်ဆောင်ရခဲ့ရင် ငါမင်းကိုဆက်ဆက်လာခေါ်ပါ့မယ်
အဲဒီအလွမ်းတွေနဲ့ငါညဉ့်နက်နေရဆဲပေါ့
ဖေဖော်ဝါရီ…….။

မိုးလှိုင်ည