ဒီနေရာမှာ ပညာတတ်တွေပေါတယ်
ငါ ဆရာမ လုပ်ဖို့မလိုဘူး
ကမ္ဘာတစ်ဖက်မှာ
လမ်းပျောက်နေတဲ့ မျက်လုံးတွေရှိတယ်။
ဒီနေရာမှာ ပါရဂူတွေပေါတယ်
ငါ ဆရာဝန် လုပ်ဖို့မလိုဘူး
ကမ္ဘာတစ်ဖက်မှာ
အသက်ငင်နေတဲ့ ၀ိညာဉ်တွေရှိတယ်။
ဒီနေရာမှာ မိုးလုံ လေလုံတယ်
ငါ အင်ဂျင်နီယာ လုပ်ဖို့မလိုဘူး
ကမ္ဘာတစ်ဖက်မှာ
ကြယ်မြင်လမြင် မိသားစုတွေရှိတယ်။
ဒီနေရာမှာ အစာရေစာဝတယ်
ငါ ဘာမှ စိုက်ပျိုးနေဖို့ မလိုဘူး
ကမ္ဘာတစ်ဖက်မှာ
ဆာလောင်နေတဲ့ အစာအိမ်တွေရှိတယ်။
ဒီနေရာမှာ လွတ်လပ်မှုတွေ စီးဆင်းတယ်
ငါ အော်ဟစ်နေဖို့မလိုဘူး
ကမ္ဘာတစ်ဖက်မှာ
အပိတ်လှောင်ခံ လွတ်မြောက်လိုစိတ်တွေရှိတယ်။
ဒီနေရာမှာ နီယွန်မီးတွေလင်းတယ်
ငါ့ကိုယ်ငါ ထွန်းညှိစရာမလိုဘူး
ကမ္ဘာတစ်ဖက်ခြမ်းမှာ
အမှောင်ကြီးစိုးတဲ့ ညတွေများတယ်။
နိုင်းနိုင်းစနေ
No comments:
Post a Comment