ကောင်းကင်မှာ
ကြယ်တွေရှိတယ်…
ကြယ်တွေမှာတော့
ကောင်းကင်မရှိဘူး..။
အချိန်မှာ
အနံ့အရသာ အကောင်အထည် မရှိဖူး
ငါတို့ မတို့မထိ
မစပ်ဆက်တဲ့ အမှတ်ရခြင်းတွေရှိတယ်…။
အလင်းနှစ်များစွာ
ဖြတ်သန်းပြီး မှောင်ကန်းကန်း
ယဉ်ကျေးမှုထဲ
တစ်ယောက်လည်မျိုကို တစ်ယောက် ဓားနဲ့လှီးတယ်…။
ကိုယ့်ဥပဒေနဲ့
ကိုယ်အကာကွယ်ယူလို့
အာကာသထဲကို
ပထမဆုံး ရောက်ခဲ့တဲ့ ခွေးတစ်ကောင်ဟာ
လူမျိုး ဘာသာ
အသားအရောင် မခွဲခြားသူပါ…။
တီထွင်မှုနဲ့
အတွေးအခေါ်တွေ ပေါများပြည့်လျှံနေတာတောင်
လူသားဟာ မပြည့်စုံနိုင်ဘူး…
အဲဒီအတွက်
ကိုးကားချက်တွေလိုတယ်…
ဆုတောင်း
ဝတ်ပြုပြီးတာနဲ့ ဘုရားသခင်ကို
စစ်ကြေငြာတော့တာပဲ…
ကိုယ့်ကိုယ်ကို
လိမ်ညာထားတာ ဘယ်လောက်ကြာပြီလဲ…
ကျွန်တော်တို့
ငြိမ်းငြိမ်ချမ်းချမ်း သတ်ဖြတ်နေတာ
တရားတော်နဲ့အညီ
ဥပဒေနဲ့အညီ
အမှန်တရားနဲ့အညီ
ပရီမီးယားလိဒ်
ဘောလုံးပွဲတွေလို
တစ်ရာသီပြီး
တစ်ရာသီ….
မိုးလှိုင်ည
No comments:
Post a Comment