Pages

Sunday, January 23, 2011

အစိမ်းသေ

ဘယ်ကစလောင်ကျွမ်းရမယ်မသိ
ဓားရိုးကို ဓားရိုးအတိုင်း ကမ်းခဲ့ရတဲ့
နေ့တွေပဲ

သေကွဲရှင်ကွဲတွေကြား
မသေမရှင် ကျန်ရစ်ခဲ့ရတဲ့
နေ့တွေပဲ

ခုလည်း
တညောင်ညောင်အော်မြည်နေတဲ့ နာရီက
ည(၁၁)နာရီခွဲပြီတဲ့
ညနဲ့ (၁၁)နာရီကလည်း
ငါ့ကို ခွဲပြန်ပေါ့
‘ငါ’……
‘ည’….
‘၁၁နာရီ’…
ခွဲပြီ။

ပါရမီအခံကိုက
လွမ်းတတ်တာပါ ‘ကိုယ့်သင်းရနံ့လေးရယ်’

မင်းကလေးရဲ့ချွဲနွဲ့သံမှာတောင်
တတိယနိုင်ငံရဲ့ ‘အလံ’ တွေပါတယ်။

မဟာယဉ်ကျေးမှုတော်လှန်ရေးရယ်
ဥက္ကဌကြီး ‘မော်’ မယားငယ်ယူတာကအစ
အားကျမိတယ်

ကလေးတွေက မြေတလင်းမှာ
ဘုရားစာကို ကစားစရာလုပ်လို့
လူကြီးတွေက အိမ်ဦးခန်းမှာ
လေးချိုးကဗျာကို ကစားစရာလုပ်လို့

ပင်ဒါဝက်ဝံလေးတွေ မျိုးတုံးတော့မယ်
ကိုယ်လည်း ဆန္ဒမဲ မပေးဖူးသေးဘူး

သံသရာဟာ သံသရာအတွက်
သံသရာဟာ ပြည်သူ့အတွက်
သံသရာဟာ ဘယ်သူ့အတွက်မှ မဟုတ်ဘူး

ဘဝမှာ
ဘဝရှင်မင်းတရားကြီးလည်း မဖြစ်ချင်ပါ

ဆံပင်ဖြတ်လိုက်
ဆေးလိပ်ဖြတ်လိုက်
အရက်ဖြတ်လိုက်
ပြီးတော့….
လက်ကိုပါ ဖြတ်လိုက်

ရုပ်နဲ့နာမ်မှာ
ရုပ်က နံတာလား
နာမ်က နံတာလား
ဘုရားသခင်က ဂျိုင်းပတ်စော်နံတယ်

ချစ်ခြင်းမေတ္တာကို
အမီလိုက်ကြလော့
ပေါင်မုန့်ပုံပန်းချီကားဆွဲခြင်းဖြင့်
ငတ်မွတ်ခြင်းကို ပျောက်အောင်မတတ်နိုင်
သုနာတုမေ ဘန္တေ သံဃော
……….
……….
ဟော……
လေထဲ တထောင်းထောင်းမျောလို့
အမျှဝေသံတွေလား
ကိုယ်မကြားလိုက်မိဘူး။ ။

(ကောရိသ်နုသြဝါဒ ပထမစာစောင် အခန်းကြီး (၁၄)၊ အခန်းငယ် (၁)
အမ်စတာဒမ်မြို့လယ်တနေရာက ဆိုင်းဘုတ်၊ ကမ္မဝါစာ)

သစ်ကောင်းအိမ်
၂၀၀၆၊အောက်တိုဘာ